Eph 4 | ATA | STEP | Eni Paulo exolu no nano no taasou navunavu xo eni e'oxonu xaixai noxou Tila aloxo ne la sou, eni avikalangengi pekia'u aloxo 'o. Lataua mu'avalinge sou ngataxanu 'ava noxou mo ngamulinu manina. Mo ngamulinu 'ili'ilixo mulapu noxou.

a 4:1Kol 1:10

b 4:2Kol 3:12-13

c 4:3Kol 3:14-15

d 4:61Ko 12:6

e 4:7Rom 12:3, 6

f 4:8Lex 68:18

g 4:9Ioa 3:13

h 4:111Ko 12:28

i 4:13Kol 1:28

j 4:15-16Kol 1:18, 2:19

k 4:17Rom 1:21; 1Pi 1:14

l 4:22Rom 8:13; Kol 3:9

m 4:23Rom 12:2

n 4:24Tav 1:26; Kol 3:10

o 4:25Sek 8:16; Kol 3:8-9

p 4:26Lex 4:4; Iak 1:19-20

q 4:29Kol 4:6

r 4:30Ais 63:10; Ep 1:13-14; 1Te 5:19

s 4:31Kol 3:8

t 4:32Mat 6:14, 18:22-35; Kol 3:12-13

Ephesians 4

Nenge Texali Vilesisi Noxou Kalisito

1 ^aEni Paulo exolu no nano no taasou navunavu xo eni e'oxonu xaixai noxou Tila aloxo ne la sou, eni avikalangengi pekia'u aloxo 'o. Lataua mu'avalinge sou ngataxanu 'ava noxou mo ngamulinu manina. Mo ngamulinu 'ili'ilixo mulapu noxou. 2 ^bMo ngataloxolingenge manina noxi'a ta menexinge mo opongengi uai se'isisi noxi'a. Mo la'iangengei'a paleai'a uasi. Ngingi ngamulinu 'ili'ilixo mulapusi. Mo tanengingenge ngatongato'o. 3 ^cMo xavingengiu 'ilixo sou ngaxolu ngapita. No anu xavi Uleenu la Anu ulosinge opo se'isisi, la sou usakingengi la ngaxolu ngapita mo ngaxali vilesisi. 4 Nenge texali vasimenge vilesisi mo Uleenu Tavuna vilesisi uxoo noxinge. Aloxo Lataua mu'avalinge la sou ngingi ngaloopala no anu mii vilesisi. Mii vilesisi ne lexe Lataua umomomosou vaikala noxou la ulosinge mimii lailaixe ane Anu mu'avalingexu ne. 5 Tila anu vilesisi mo muxamuxaxu tanenge ne vilesisi xe 'ilixo sou ta'ulo ne anu vilesisi. 6 ^dMo Lataua vilesisi anu Maminge nenge latala mukalusi. Anu usaxila'a ta mitema mukalusi mo Anu uxaxai noxi'a ta mitema mukalusi xe Anu uxolu no nano noxi'a ta mitema mukalusi.

7 ^eIa noxinge vilevilesi la Anu mualaunasinge laixe la sou Kalisito mumila'anu mimii lailaixe noxou ne sou mulosinge. 8 ^fTava'u aloxo ne la sou vaikala mikaukavunu muai no nano no anu Lavuku Tavuna teinu muvikala aloxo 'o.

“No voxo ane Anu mutelai teitexi
la muno'a ta mitema tavu'alo mitilitili'usi'a milai kalumo
la mumila'anu mimii lailaixe noxi'a ta mitema.”
9 ^gIa Anu mutelai teitexi laaxu a loxovaa? Anu laaxu lexe Anu mulu'e no lia 'o mo mulu'elai no lia manina. 10 Anu ane mulu'e no lia 'osi ane mutelai teitexi no loxotolo mo mua'ulixu loxotolo ne ia mulai teitexi manina. Anu mu'oxonu aloxo ne mo sou Anu uxolu no anu mimii latala no lia 'o mo opo loxotolo ukalusi la sou Kalisito uxali usaxila'u mii mukalusi. 11 ^hAnusisi ane mulosi'a ta mitema xaixai sou ixaxaisou. Se'i mulosi'a xaixai sou mixali ta mitema ane Iesu mupalusi'a. Mose'i mulosi'a xaixai sou mixali ta mitema sou palomatana, mose'i mixali ta mitema sou ia'aloxu a'alo laixe sou Iesu ulai noxi'a ta mitema mose'i mixali ta mitema sou isaxila'a ta mitema mo ilosi'a ta mitema lavulavu sou imulinu 'ili'ilixo ma'ia Lataua umasaxau. 12 Kalisito mulosi'a ta mitema xaixai ane ne sou mulalaxine'i ta mitema noxou Lataua sou i'oxonu xaixai laixe noxou. Aloxo ne la sou lalotu noxou Kalisito uleme xe utulu pekia'u. 13 ⁱAnu usolonu ulai uxali no mine nenge taxali vilesisi no anu muxamuxaxu tanenge, mo no anu lavulavu noxinge noxou Lataua 'Olu. Mo lalotumenge uleme uxali utila ulai uxali no mine nenge maulinenge umomomo loxo Kalisito noxou.

14 La sou nenge tamomomo sou taxolu loxo ta molomolo la uasi. Mo mamu sou ngalomuxu vaivaikala noxi'a ta mitema sou isuisu mo kalakalavoi. Xo anu u'oxongenge la xavutalamenge ulai une'e loxo lasipi xasi mo atume utavutavulenu. 15 ^jIa tanengexa'a ta menexinge mo tavikala maninasi noxi'a. La sou Anu u'oxonenge taleme noxou Kalisito e Anu kisinge. 16 No anu saxisaxila'u noxou la Anu mu'oxonu mineminenge iouiou no vasimenge ne mupitanu mo mutoxotoxo vaxa la sou muxali itema vasimolu. La sou no anu mineminenge iouiou no vasimenge ne uxaxaisou xaixai na'u vilevilesi la uxali tatila mo uleme loxo Kalisito tanunenge.

Ngaxolu loxo Lamana ta 'Olu

17 ^kLa sou eni avikalangengixu mimii 'o mo apeletotosinge no ualasou Tila lexe, mamu sou ngaxolu loxo ta mitema ane'i ane ta Iutaia uasi. Ane'i xavutalai'a ne uxovulaulau vitanisi. 18 Mo xavutalai'a ne lamana uasi mo ie'i isivoxo xe mitatusou opone'i pekia'u la sou mu'oxone'i mixolu va'axu no anu mauli ane noxou Lataua. 19 Mo xavutala laixe ne musu'a la sou mu'oxone'i la imaela no anu 'ili'ilixo masumasua ane i'oxo'oxonu ne uasi manina. Mo mi'unalai manina no anu 'ili'ilixo masumasua utotomu misevile.

20 Ia ngingi ngene'e sou ngalavusou Kalisito no anu vote'i aloxo ne uasi. 21 Mo eni elavusou lexe ngingi ngelomusou a'alosou, mo Anu mulosiengi mukalu. Sou ngamulinu vaikala manina ane muxolu noxou Iesu. 22 ^lMo mulosiengi sou ngamulinu mauli ane ngemulimulinu tei ne uasi. Mo ngaxexeenu itema ane teinu e uxolu noxinge la u'oxonu masuangengi la sou uavutilixu xavutala masumasua la sou u'oxongengi ngaulua ne usu'a. 23 ^mMo xavutalamengi ne uxiu mo uxali alavua manina. 24 ⁿMo ngingi ngemulinu mauli alavua la ngexali itema ane alavua, loxo ta mitema Lataua mukoine'i sou ixali loxo Anu, sou ngemulinu 'ili'ilixo mulapu mo malemalenga manina mo ngexolu va'axu no anu 'ili'ilixo masumasua manina.

25 ^oAloxo ne la sou ngasu'anu 'ilixo sou ngakalakalovoine'i ta mingemingengi ia ngavikalane'i maninasi. Xo nenge vilevilesi 'o tapita no anu Kalisito vasimolu. 26 ^pLexe ngingi la'iangenge la mamu sou u'oxongengi ngasusu. Mo mamu sou la'iangenge uxoxolu ulai uxali no aso ulu'elai. 27 Mo mamu sou ngalosou Satani taiinu vile. 28 La sou 'ei ane upakapakali ne mamu sou upakapakali. Ia laixe lexe anu uxaxai mo ususunu avolu ulu'elai no lia mo sou umolo mimii la usu'uline'i ane'i ane xa'a mimii uasi.

29 ^qMo ngavivikala la mamu sou vaikala masumasua ulaa no anangenge. Ia ngaleanu vaivaikala lailaixesi sou u'oxonu pekia'a ane'i ane imasaxau su'uli xe usu'uline'i no anu alauna ane'i ane ilolomu kalumo. 30 ^rXo voxo a une'e la sou Lataua mululusinge mo musosovosinge no anu Uleenu Tavuna noxou sou ulotongengi ngalivu. La sou mamu sou ngalosou Uleenu Tavuna noxou Lataua tu'umaxu. 31 ^sLa sou laixe lexe ngaxexeenu 'ilixo sou opo masumasua mo 'ilixo sou la'iangenge mo 'ilixo sou ngakaikaitolo la ngaleanu vaikala masumasua noxi'a ta mitema. 32 ^tIa tangengixa'a mo nga'oxonu 'ilixo sou opo se'isisi noxi'a ta menexinge ngatongato'o. Mo ngaxiunu tumalingeu 'ilixo ma'ia ane'i mi'oxonu mune'e noxinge. Aloxo noxou Kalisito la Lataua muxiunu tumalouu 'ili'ilixo masumasua noxinge.